Segne Capoulié, segne conse, cars amis,

1970, acò èro i’a 50 ans, Clément Caraman, en aquest tèms proumié ajoun au conse, foundo l’Associacioun di Miejournau de Scéus.

La neissènço d’aquesto associacioun s’iscriéu dins uno tradicioun que lou sourgènt n’es ren de mai que tèune : quatre coublets en Lengadoucian cita en noto de bas de pajo d’un meloudramo pastourau. « Estelle et Némorin » es coumpausa en 1788 pèr Jean Pierre Claris de Florian que l’obro es en plen en Francés. Florian natiéu de Sauve dins lou Gard, quito si Ceveno à l’age de 10 ans pèr èstre plaça à Paris ; à 13 ans, devèn page dóu Duc de Penthièvre emai à n’aquelo pountanado, es presenta à Voltaire de quau es lou pichot nebout pèr alianço.

Un siècle mai tard, en 1877, Pau Arène e Valère Vernier, disciple de Frederi Mistral, arribon à Scéus emé lou trin e descurbon fàci la garo, au pèd de la gleiso San-Jan-lou-Batisto, lou mounumen funerau de Florian. La tradicioun felibrenco e miejournalo de Scèus èro nascudo.

Passon lis annados. En 1950, Scèus es prouclamado « Ciéuta felibrenco », enclavo miejournalo à l'uba de la Lèiro.

E la vido countunuio de viéure : 1979, centenàri de la proumiero felibrejado, 1984, de novo, la Santo Estello. Marcat de Prouvènço, Fiero i santouns, biennallo de l’art santounenc, counferenci, councerts, acamp e sesiho de touto meno. Aro, mi pensado soun pèr Clément, Daniso, Jacque, Claude et pèr tóuti aquèli qu’an oubra eme éli.

Que posquon li desenado d’an que venon nous véire manteni nostro amo miejournalo, nostro culturo, nostro lengo, nostre biais particulié de vièure qu’es aquèu dis ome et fremo dóu Miejour.

Bon anniversàri…. en retard ! Grammacì.